Мелофлекс 15 мг 1,5 мл №3,амп

Сипаттама

Дәрілік затты медициналық қолдану жөніндегі нұсқаулық

МЕЛОФЛЕКС РОМФАРМ

Саудалық атауы

Мелофлекс Ромфарм

Халықаралық патенттелмеген атауы

Мелоксикам

Дәрілік түрі

Бұлшықет ішіне енгізуге арналған ерітінді, 15 мг/1.5 мл

Құрамы

Бір ампуланың ішінде

белсенді зат – 15.0 мг мелоксикам,

қосымша заттар: меглюмин, гликофурол, полоксамер 188, глицин, натрий хлориді, 1 М натрий гидроксидінің ерітіндісі, инъекцияға арналған су.

Сипаттамасы

Жасылдау реңді сары түсті мөлдір ерітінді.

Фармакотерапиялық тобы

Қабынуға қарсы стероидты емес препараттар. Оксикамдар.

Мелоксикам.

АТХ коды М01АС06

Фармакологиялық қасиеттері

Фармакокинетикасы

Сіңуі
Бұлшықет ішіне енгізгеннен кейін мелоксикам толық сіңеді. Салыстыру үшін, пероральді түрде қолданғанда мелоксикамның биожетімділігі 89%-ға жуықты құрайды. Бұлшықет ішіне енгізуден пероральді қолдануға ауысқан кезде дозаны түзетудің қажеттілігі жоқ.

Бұлшықет ішіне 15 мг мелоксикам дозасын енгізгеннен кейін, ең жоғары плазмалық концентрация 1.62 мкг/мл-ге жуықты құрайды және оған шамамен 60 минут ішінде жетеді.

Таралуы

Мелоксикам плазма ақуыздарымен, негізінен альбуминмен үлкен шамада (99%) байланысады. Мелоксикам синовиальді сұйықтыққа еніп, плазмалық концентрацияның жартысына жуықты құрайтын мәндегі концентрацияларға жетеді. Таралу көлемі төмен, орта есеппен 11 л-ге жуық, интержекелей өзгергіштігі 30-40% құрайды.

Метаболизм
Мелоксикам негізінен бауырда метаболизденеді. Несепте фармакодинамикалық тұрғыдан белсенді емес әртүрлі 4 метаболит табылды.

Негізгі метаболит 5'-карбоксимелоксикам (дозаның 60%-на сәйкес келеді) аралық метаболит 5'-гидроксиметил-мелоксикамның тотығуы жолымен түзіледі (дозаның 9%-на сәйкес келеді). Іn vitroзерттеулер CYP 2C9 осы метаболизмдік жолда, CYP 3A4 изоферментінің аздаған үлес қосуымен, маңызды рөл атқаратынын көрсетеді. Препарат дозасы шамасының 16%-ын және 4%-ын құрайтын басқа екі метаболиттің түзілуіне пероксидаза қатысуы мүмкін.

Шығарылуы
Мелоксикам көбіне метаболиттер түрінде шығарылады, олар несеппен және нәжіспен тең пропорцияда шығарылады. Тәуліктік дозаның 5%-дан азы өзгермеген күйінде нәжіспен бірге шығарылады, ал несеппен бірге бастапқы қосылыстардың қалғаны ғана шығарылады.

Енгізгеннен кейін жартылай шығарылу кезеңі 13-тен 25 сағатқа дейін өзгеріп отырады. Жалпы плазмалық клиренсі 7-12 мл/мин құрайды.

Дозаға байланыстылығы/байланысты еместігі

Пероральді немесе бұлшықет ішіне қолданудан кейін 7.5 мг-ден 15 мг-ге дейінгі дозаларда мелоксикам дозаға байланысты фармакокинетикалық қасиеттерге ие болады.

Пациенттердің ерекше топтары
Бауыр/бүйрек функцияларының жеткіліксіздігі бар пациенттер

Мелоксикамның фармакокинетикалық қасиеттері бауыр функциясының жеткіліксіздігінде де, бүйрек функциясының орташа жеткіліксіздігінде де айтарлықтай қозғалмаған. Бүйрек функциясының ауыр жеткіліксіздігінде таралу көлемінің ұлғаюы бос мелоксикам концентрацияларының көбірек жоғарылауына әкеп соғуы мүмкін. Мұндай жағдайда тәуліктік доза 7.5 мг-ден аспауы тиіс.

Егде жастағы адамдар

Егде жастағы еркектердегі фармакокинетикалық параметрлер жас еркектердегі параметрлермен ұқсас болады.

Егде жастағы әйелдерде, жастау пациенттермен салыстырғанда, AUC мәндері өте жоғары және жартылай шығарылу кезеңі ұзағырақ болады.

Фармакодинамикасы

Мелоксикам енол қышқылының класына жататын қабынуға қарсы стероидты емес препарат (ҚҚСП) болып табылады және қабынуға қарсы, ауыруды басатын және қызуды түсіретін әсер береді.

Жоғарыда берілген әсерлердің механизмі мелоксикамның қабыну медиаторлары болып табылатын простагландиндер биосинтезін тежеу қабілетінен тұрады. Мелоксикамның қабынуға қарсы айқын әсері қабынудың барлық стандартты үлгілерінде анықталған. Әсер ету механизмі көбіне қабыну үдерістерінің дамуына қатысатын спецификалық фермент - циклооксигеназа-2-нің (ЦОГ-2) селективті тежелуімен байланысты. ЦОГ-2 тежелуі ҚҚСП емдік әсерін қамтамасыз етеді деп есептеледі, ал үнемі қатысатын ЦОГ-1 изоферментінің тежелуі асқазан және бүйрек тарапынан жағымсыз әсерлерге себеп болуы мүмкін.

Мелоксикамның ЦОГ-2-ге қатысты селективтілігі әртүрлі тест-жүйелерде in vitro да, сонымен қатар in vivo да айғақталды.

Мелоксикамды қолданумен байланыстырылған АІЖ жоғарғы бөлімдеріндегі тесілу, ойылу және қан кетулер жиілігі төмен және препарат дозасының шамасына байланысты болды.

Қолданылуы

Емдеудің бастапқы кезеңінде және, емдеу пероральді немесе ректальді түрде қолданылуы мүмкін болмаған кезде, қысқа мерзімдік симптоматикалық ем ретінде:

• остеоартриттегі (артрозда, буындардың дегенеративті ауруларында) ауыру синдромында
• ревматоидты артритте
• шорбуынданатын спондилоартритте

Қолдану тәсілі және дозалары

Бұлшықет ішіне енгізу.

Күніне бір рет енгізілетін 15 мг бір доза.

Дозаны күніне 15 мг-ден арттырмаңыз.

Мелофлекс Ромфарм препаратын бұлшықет ішіне енгізу емдеудің тек алғашқы бірнеше күні ішінде, бірақ жағдайдың ауырлығына байланысты 3-тен 5 күнге дейін (мысалы, пероральді немесе ректальді түрде қолдану мүмкін болмаған кезде) қолданылады. Жағымсыз реакциялар симптомдарды бақылау үшін қажетті ең аз кезең бойы тиімді ең аз дозаларды қолданған кезде шектелуі мүмкін.

Симптомдардың жақсаруына және емге жауабына мезгіл-мезгіл баға берілуі тиіс.

Остеоартриттегі ауыру синдромы: тәулігіне 7.5 мг. Қажет болған кезде дозаны тәулігіне 15 мг-ге дейін арттыруға болады.

Ревматоидты артрит: тәулігіне 15 мг. Емдік реакцияға сәйкес дозаны тәулігіне 7.5 мг-ге дейін азайтуға болады.

Шорбуынданатын спондилоартрит: тәулігіне 15 мг. Емдік реакцияға сәйкес дозаны тәулігіне 7.5 мг-ге дейін азайтуға болады.

Арнайы популяциялар

Егде жастағы пациенттер және жағымсыз реакциялардың даму қаупі жоғарылаған пациенттер:

Егде жастағы адамдар үшін ұсынылатын доза тәулігіне бір рет 7.5 мг құрайды.

Жағымсыз реакциялардың даму қаупі жоғары, мысалы, асқазан-ішек аурулары немесе жүрек-қантамыр ауруларының қаупі бар пациенттерде емдеу тәулігіне бір рет 7.5 мг дозадан (сыйымдылығы 1.5 мл ампуланың жартысы) басталуы тиіс.

Бүйрек функциясының жеткіліксіздігі бар пациенттер:

Гемодиализде жүрген, бүйрек функциясының ауыр жеткіліксіздігі бар пациенттер үшін мелоксикамның дозасы 7.5 мг-ден (сыйымдылығы 1.5 мл ампуланың жартысы) арттырылмауы тиіс. Бүйрек функциясының жеңіл немесе орташа жеткіліксіздігі бар (креатинин клиренсі минутына 25 мл-ден көбірек) пациенттер үшін дозаны азайтудың қажеттілігі жоқ.

Бауыр функциясының жеткіліксіздігі бар пациенттер:

Бауыр функциясының жеңіл немесе орташа жеткіліксіздігі бар пациенттер үшін дозаны азайтудың қажеттілігі жоқ.

Балалар мен жасөспірімдер:

Мелофлекс Ромфарм препаратын 18 жасқа дейінгі балалар мен жасөспірімдерге қолдануға болмайды.

Қолдану тәсілі:

Препарат бөксенің сыртқы жоғарғы шаршысындағы бұлшықет ішіне терең инъекция арқылы, асептикалық әдістерді қатаң пайдалана отырып, баяу енгізіледі. Қайталап енгізген жағдайда оң жағынан сол жағына кезектестіріп енгізу ұсынылады.

Егер енгізу кезінде пациент қатты ауырғанын байқаса, енгізуді дереу тоқтату қажет.

Егер санда протез бар болса, онда препаратты қарама-қарсы жағына енгізу керек.

Үйлесімсіздіктің болуы мүмкін екендігін ескеріп, ампуланың ішіндегісін бір шприцте басқа дәрілік затармен араластырмаған жөн!

Мелофлекс Ромфарм препаратын вена ішіне енгізуге тыйым салынады.

Жағымсыз әсерлері

Клиникалық зерттеулер және эпидемиологиялық деректер кейбір ҚҚСП (әсіресе жоғары дозаларда және ұзақ емделгенде) пайдалану артериялық тромбоздық асқынулардың (мысалы, миокард инфарктісі және инсульт) пайда болуының сәл жоғары қаупін туындатуы мүмкін деп жорамал жасауға мүмкіндік береді.

ҚҚСП қолданумен байланысты мәлімделген жағымсыз реакциялар ісіну, гипертония және жүрек функциясының жеткіліксіздігі болды.

Көбірек жиі жағымсыз реакциялар асқазан-ішек жолы деңгейінде байқалды. Әсіресе егде жастағы адамдарда, кейде өліммен аяқталатын, пептикалық ойық жаралар, асқазан-ішектік тесілулер немесе қан кетулер пайда болуы мүмкін. Қолданғаннан кейін жүректің айнуы, құсу, диарея, метеоризм, іш қату, диспепсиялар, іштің ауыруы, мелена, қан құсу, ойық жаралы стоматит, колиттің және Крон ауруының өршуі жөнінде мәлімделді. Азырақ жиі кездескен жағымсыз әсер гастрит болып табылады.

Жағымсыз құбылыс жағдайлары былайша жіктеледі:

- Өте жиі (≥1/10)
- Жиі (≥1/100 және <1/10)
- Жиі емес (≥1/1000 және <1/100)
- Сирек (≥1/10000 және <1/1000)
- Өте сирек (<1/10 000)
- Белгісіз (қолда бар деректермен баға берілуі мүмкін емес).

Гематологиялық және лимфалық бұзылулар
Жиі емес: анемия

Сирек: қан жасушалары санының өзгеруі (соның ішінде лейкоцитарлы формуланың өзгерулері), лейкопения, тромбоцитопения, цитопения (потенциалды миелоуытты дәрілік заттарды, атап айтқанда метотрексатты, бір мезгілде қолданғанда).

Мелоксикамды басқа потенциалды миелоуытты препараттармен бірге қабылдаған пациенттерде агранулоцитоздың өте сирек жағдайлары мәлімделді.

Иммун жүйесінің бұзылулары

Жиі емес: дереу типті емес аса жоғары сезімталдықтың басқа да реакциялары

Сирек: анафилаксиялық шок, анафилаксиялық реакциялар, анафилактоидтық реакциялар

Психикалық бұзылулары

Сирек: көңіл-күйдің өзгеруі

Белгісіз: сананың шатасуы, бағдардың бұзылуы

Жүйке жүйесінің бұзылулары

Жиі: бас ауыру

Белгісіз: бас айналу, ұйқышылдық

Көру мүшесінің бұзылулары

Сирек: конъюнктивит, көрудің бұзылулары, соның ішінде көрудің жіті болмауы

Есту мүшесінің және тепе-теңдіктің бұзылулары
Жиі емес: бас айналу
Сирек: құлақтың шуылдауы

Жүректік бұзылулары

Сирек: жүректің қағуы

ҚҚСП қолданғанда жүрек функциясының жеткіліксіздігі жөнінде мәлімделді.

Қантамырлық бұзылулар

Жиі емес: артериялық қысымның жоғарылауы, бетке қан тебу сезімі

Тыныс алу, кеуде қуысы ағзаларының және көкірек ортасының бұзылулары

Сирек: бронх демікпесінің жедел дамуы (ацетилсалицил қышқылына немесе басқа ҚҚСП-ке аллергиясы бар пациенттерде)

Асқазан-ішек жолының бұзылулары

Жиі: іштің ауыруы, диспепсия, диарея, жүректің айнуы, құсу

Жиі емес: асқазан-ішектен жасырын немесе айқын қан кету, гастрит, іш қату, метеоризм, кекіру, стоматит

Сирек: гастродуоденальді ойық жара, колит, эзофагит

Өте сирек: әсіресе егде жастағы пациенттерде асқазан-ішек жолының тесілуі (өліммен аяқталуы мүмкін)

Гепатобилиарлық бұзылулар

Жиі емес: бауыр функциясы параметрлерінің өткінші өзгерулері (мысалы, қан сарысуында трансаминазалар белсенділігінің немесе билирубиннің жоғарылауы)

Өте сирек: гепатит.

Тері және теріасты клетчаткасы тарапынан бұзылулар

Жиі емес: ангионевроздық ісіну, қышыну

Сирек: есекжем, уытты эпидермальді некролиз, Стивенс-Джонсон синдромы

Өте сирек: буллез типті дерматит, мультиформалы эритема, бөртпе

Белгісіз: фотосенсибилизация реакциялары

Несеп-жыныс жүйесінің бұзылулары

Жиі емес: бүйрек функциясы көрсеткіштерінің өзгерулері (қан сарысуындағы креатинин және/немесе мочевина деңгейлерінің жоғарылауы)

Өте сирек: бүйрек функциясының жедел жеткіліксіздігі (әсіресе қауіп факторлары бар пациенттерде), несеп шығарған кездегі қиындық, несептің жедел іркілуі

Ұрпақ өрбіту жүйесінің бұзылулары:

Белгісіз: әйел бедеулігі, овуляцияның кідіруі

Жалпы бұзылулар және жергілікті реакциялар

Жиі: енгізген жердің ісінуі және ауыруы

Жиі емес: ісінулер, аяқтың ісінуін қоса

Препаратты қолданумен байланысты әлі біліне қоймаған, әдетте препараттардың басқа кластарына меншіктелетін жағымсыз реакциялар

Бүйрек функциясының жедел жеткіліксіздігіне әкеп соғуы мүмкін бүйректің органикалық зақымданулары жөнінде мәлімделді: интерстициальді нефриттің, нефроздық синдромның, жедел тубулярлы некроздың, папиллярлы некроздың өте сирек жағдайлары мәлімделді.

Қолдануға болмайтын жағдайлар

- мелоксикамға немесе препараттың кез келген басқа компонентіне жоғары сезімталдық

- ұқсас әсері бар субстанцияларға, мысалы, ҚҚСП, ацетилсалицил қышқылына жоғары сезімталдық

- анамнезде ацетилсалицил қышқылымен немесе басқа ҚҚСП бірге пайдаланған кезде болған демікпе, мұрын полиптері, ангионевроздық ісіну және есекжем белгілері

- коронарлы артерияларды шунттауға арналған трансплантатты (КАШТ) орналастыру аймағындағы периоперациялық ауыру

- асқазанның және он екі елі ішектің шырышты қабығының эрозивті-ойық жаралы өзгерулері/өршу сатысындағы немесе жақында бастан кешкен тесілулер

- ішектің жедел қабыну аурулары (өршу сатысындағы спецификалық емес ойық жаралы колит, Крон ауруы)

- ауыр бауыр жеткіліксіздігі

- ауыр бүйрек жеткіліксіздігі (егер гемодиализ жүргізілмесе)

- ойық жаралы асқазан-ішектік қан кету, жақында бастан кешкен цереброваскулярлық қан кету немесе басқа да геморрагиялық аурулар

- декомпенсацияланған жүрек жеткіліксіздігі

- бұлшықетішілік гематоманың даму ықтималдылығын ескеріп, антикоагулянттарды бір мезгілде қабылдау

- жүктілік және лактация кезеңі

- 18 жасқа дейінгі балалар мен жасөспірімдер

Дәрілермен өзара әрекеттесуі

Дәрілермен өзара әрекеттесуге зерттеулер тек ересектерде ғана жүргізілді.

Фармакодинамикалық өзара әрекеттесулер

Басқа да ҚҚСП және ацетилсалицил қышқылы күніне ≥3 г

Мелоксикамды басқа ҚҚСП-пен, соның ішінде (жекелей доза ретінде ≥1 г немесе жалпы тәуліктік доза ретінде ≥3 г) дозада қолданылған ацетилсалицил қышқылыменбір мезгілде қолдану ұсынылмайды.

Кортикостероидтар (мысалы, глюкокортикостероидтар)

Кортикостероидтармен бір мезгілде қолдану қан кету немесе асқазан-ішектік ойылулар қаупінің жоғары болуына байланысты сақтықты қажет етеді.

Емдік дозалардағы немесе егде жастағы адамдар үшін түзетілген дозалардағы пероральді антикоагулянттар немесе гепарин

Тромбоцитарлық функцияның тежелуіне және гастродуоденальді шырышты қабыққа әсеріне байланысты, қан кету қаупі жоғарылайды. ҚҚСП варфарин сияқты антикоагулянттардың әсерін күшейтуі мүмкін. Емдік дозалардағы және егде жастағы адамдар үшін түзетілген дозалардағы ҚҚСП және пероральді антикоагулянттарды немесе гепаринді бір мезгілде қолдану ұсынылмайды.

Қалған жағдайларда гепарин қан кету қаупінің жоғарылауына байланысты сақтықпен қолданылады.

Егер пероральді антикоагулянттармен бір мезгілде қолдануға жол бермеу мүмкін болмаса, халықаралық қалыпты коэффициентті мұқият бақылау қажет.

Тромболитикалық және антитромбоцитарлық препараттар

Тромбоцитарлық функцияның тежелуіне және гастродуоденальді шырышты қабыққа әсеріне байланысты, қан кету қаупі жоғары.

Серотонинді кері қармап қалудың селективтік тежегіштері

Асқазан-ішектік қан кету қаупі жоғары.

Диуретиктер, АӨФ тежегіштері және ангиотензин II рецепторларының блокаторлары

ҚҚСП диуретиктердің және басқа да гипотензиялық препараттардың әсерін төмендетуі мүмкін. Бүйрек функциясы бұзылған кейбір пациенттерде (мысалы, сусызданған пациенттерде немесе бүйрек функциясы әлсіреген егде жастағы пациенттерде) АӨФ тежегіштерін немесе ангиотензин II антагонистерін және циклооксигеназаны тежейтін препараттарды қатарластыра қолдану бүйрек функцияларының кейіннен өзгеруін туындатуы мүмкін, соның ішінде әдетте қайтымды болатын бүйрек функциясының жедел жеткіліксіздігі болуы мүмкін. Осылайша, бұл біріктірілімдерді, әсіресе егде жастағы адамдарда, сақтықпен пайдаланған жөн.

Мелофлекс Ромфарм және диуретиктер қабылдап жүрген пациенттер адекватты түрде гидратациялануы тиіс және олардың бүйрек функциясын емдеуді бастағаннан кейін және осыдан кейін мезгіл-мезгіл бақылап отыру керек.

Басқа гипотензиялық дәрілер (мысалы, бета-блокаторлар)

ҚҚСП-пен емдеу кезінде қантамырларды кеңейтетінпростагландиндерді тежеу арқылы гипотензиялық препараттар әсерінің төмендегені жөнінде мәлімделді.

Кальциневрин тежегіштері (мысалы, циклоспорин, такролимус)
Кальциневрин тежегіштерінің нефроуыттылығы простагландиннің ықпал етуімен бүйректік әсерлер арқылы ҚҚСП-пен күшейтілуі мүмкін. Біріктірілген ем кезінде бүйрек функциясын бақылау керек. Бүйрек функциясын әсіресе егде жастағы пациенттерде мұқият бақылау ұсынылады.

Жатырішілік құрылғылар

ҚҚСП жатырішілік контрацептивтердің тиімділігін төмендететіні жөнінде мәлімдемелер бар, алайда олар қосымша айғақтауларды қажет етеді.

Фармакокинетикалық өзара әрекеттесулер: Мелоксикамның басқа препараттардың фармакокинетикасына әсерлері

Литий
ҚҚСП литийдің плазмалық концентрацияларын (литийдің бүйректік экскрециясын азайту жолымен) арттырады, ол уытты деңгейлерге жеткізілуі мүмкін. Литийді және ҚҚСП-ті бірге қолдану ұсынылмайды. Егер осы біріктірілім қажет болса, мелоксикаммен емдеуді бастағанда, дозаны түзеткенде немесе Мелофлекс Ромфарм препаратымен емдеуді тоқтатқанда плазмалық деңгейлері мұқият бақылануы тиіс.

Метотрексат

ҚҚСП метотрексаттың өзекшелік секрециясын азайтуы және осылайша плазмадағы метотрексат концентрациясын арттыруы мүмкін. Осыған байланысты, метотрексаттың жоғары дозаларын (аптасына 15 мг-ден көбірек) қабылдап жүрген науқастарға ҚҚСП бір мезгілде қолдану ұсынылмайды.

Метотрексаттың төмен дозаларын қабылдап жүрген пациенттерде, әсіресе бүйрек функциясы бұзылған пациенттерде ҚҚСП тобының препараттарын метотрексатпен өзара әрекеттесу қаупін қарастырған жөн. Егер біріктірілген ем қажет болса, гемограммаға және бүйрек функциясына мониторинг керек. Метотрексатты қолданғанда, одан кейін 3 күннен соң ҚҚСП қолданылғандасақтық танытқан жөн, өйткені мұндай жағдайда метотрексаттың плазмалық концентрациясы жоғарылауы және уыттылық ұлғаюы мүмкін.

Метотрексаттың (аптасына 15 мг) фармакокинетикалық қасиеттері мелоксикаммен қатарластыра емдеуге қатысты елеулі қозғалмаса да, ҚҚСП-пен емдеген кезде метотрексаттың гематологиялық уыттылығы күшеюі мүмкін екендігін есте ұстау қажет.

Фармакокинетикалық өзара әрекеттесулер. Мелоксикамның фармакокинетикасына басқа дәрілік заттардың әсерлері

Холестирамин
Холестирамин мелоксикамның шығарылуын энтерогепатикалық айналымды тоқтату жолымен жылдамдатады және осылайша мелоксикамның клиренсі 50%-ға жоғарылайды және жартылай шығарылу кезеңі 13 ±3 сағатқа дейін азаяды. Бұл өзара әрекеттесу клиникалық маңызға ие.

Пеметрексед

Креатинин клиренсі минутына 45-тен 79 мл-ге дейінгі пациенттерде мелоксикамды пеметрекседпен қатар қолдану үшін мелоксикам қабылдауды пеметрекседті қабылдаудан 5 күн бұрын, қабылдаған күні және қабылдағаннан кейін 2 күннен соң тоқтата тұрған жөн. Егер мелоксикамның пеметрекседпен біріктірілімі қажет болып табылса, әсіресе миелосупрессия және асқазан-ішектік жағымсыз реакциялар тұрғысынан пациенттерді мұқият бақылауға алу керек. Креатинин клиренсі минутына 45 мл-ден төмен пациенттерде мелоксикамды пеметрекседпен қатар қолдану ұсынылмайды.

Диабетке қарсы пероральді препараттар (сульфонилмочевина туындылары, натеглинид)

Мелоксикам бауырда метаболизм есебінен толық дерлік шығарылады, оның шамамен үштен екісі Р450 (CYP) цитохромының ферменттері (CYP 2C9 негізгі жолы және CYP 3A4 минорлы жолы) және үштен бірі басқа жолдар, мысалы, пероксидазалық тотығу арқылы болады. Мелоксикамды және CYP 2C9 және/немесе CYP 3A4 әдейі тежейтін немесе метаболизденетін препараттарды бір мезгілде қолданған кезде фармакокинетикалық өзара әрекеттесулердің болуы мүмкін екендігіне көңіл бөлген жөн. CYP 2C9 арқылы болатын өзара әрекеттесуді диабетке қарсы пероральді препараттар (сульфонилмочевина туындылары, натеглинид) сияқты дәрілік заттармен біріктірілімінде күтуге болады; бұл өзара әрекеттесу плазмада осы препараттар мен мелоксикам деңгейлерінің жоғарылауына әкелуі мүмкін.

Мелоксикамды және сульфонилмочевина препараттарын немесе натеглинидті қабылдап жүрген пациенттерде гипогликемияны мұқият бақылаған жөн.

Мелоксикамды және антацидтерді, циметидинді, дигоксинді, фуросемидті бір мезгілде тағайындағанда маңызды фармакокинетикалық өзара әрекеттесулер жөнінде мәлімделген жоқ.

Айрықша нұсқаулар

Симптомдарды бақылау үшін қажетті мерзім ішінде тиімді ең төмен дозаны пайдаланған кезде жағымсыз реакциялар барынша ең азға жеткізілуі мүмкін.

Ұсынылатын ең жоғары тәуліктік доза емдік әсер жеткіліксіз болған жағдайда арттырылмауы тиіс және басқа ҚҚСП емдеу сызбасына қосылмауы тиіс, өйткені бұл, емдік артықшылықтарына айғақтамалары жоқ болғанмен, уыттылықты арттыруы мүмкін. Мелофлекс Ромфарм препаратын, циклооксигеназа-2 селективті тежегіштерін қоса, ҚҚСП-пен бірге қолдануға жол бермеген жөн.

Мелофлекс Ромфарм препараты қатты ауыруы бар пациенттерді емдеу үшін ұсынылмайды. Бірнеше күннен кейін жақсару симптомдары жоқ болған жағдайда емдеудің клиникалық артықшылықтарына қайта баға беру қажет.

Мелофлекс Ромфарм препаратымен емдеуді бастар алдында толық жазылуын қамтамасыз ету үшін анамнезінде эзофагит, гастрит және/немесе пептикалық ойық жара жағдайларын зерттеу қажет. Аурудың осы типінің тарихы бар, мелоксикам қабылдап жүрген науқастарда аурудың қайталануы мүмкін екендігіне көңіл бөлген жөн.

Асқазан-ішектік әсерлер

ҚҚСП-пен емдеудің кез келген сәтінде асқазан-ішектік қан кетулер, ойық жаралар немесе тесілулер пайда болуы мүмкін, оларауыр асқазан-ішектік бұзылулар тарихы болмағанның өзінде потенциалды өлімге әкелуі, ескертетін симптомдары болуы немесе болмауы мүмкін.

Ойық жаралы ауру тарихы бар, атап айтқанда асқынған қан кетулер немесе тесілулер бар пациенттерде және егде жастағы адамдарда ҚҚСП дозаларын арттырған кезде асқазан-ішектік қан кетулер, ойық жара немесе тесілулер қаупі жоғары болады. Бұл пациенттер Мелофлекс Ромфарм препаратымен ең төмен ықтимал дозада емдеуді бастауы тиіс. Осы пациенттер үшін, сондай-ақ ацетилсалицил қышқылының немесе асқазан-ішек қаупін арттыруы мүмкін басқа препараттардың аз дозаларын қатар қолдануды керек ететін пациенттер үшін асқазанды қорғайтын дәрілермен (мысалы, мизопростол немесе протонды помпа тежегіштері) біріктіріп емдеуге көңіл бөлген жөн.

Асқазан-ішек уыттылығы тарихы бар пациенттерге, әсіресе егде жастағы адамдарға, атап айтқанда емдеудің бастапқы кезеңдерінде кез келген әдеттен тыс абдоминальді симптомдар (әсіресе асқазан-ішектік қан кетулер) жөнінде айтылуы тиіс.

Ойық жараның немесе қан кетулердің пайда болу қаупін ұлғайтуы мүмкін препараттарды, мысалы, дәрі ретінде қолданылатын гепаринді немесе гериартрияда варфарин сияқты антикоагулянттарды немесе (жекелеген доза түрінде ≥ 1 г немесе ең жоғары тәуліктік доза түрінде ≥ 3) дозада қолданылатын ацетилсалицил қышқылын қоса, ҚҚСП-ті бір мезгілде қабылдап жүрген пациенттерде сақтық танытқан жөн.

Мелофлекс Ромфарм қабылдап жүрген пациенттерде асқазан-ішектік қан кетулер немесе ойық жаралар пайда болған кезде емдеу тоқтатылуы тиіс.

ҚҚСП-ті асқазан-ішек ауруларының тарихы (спецификалық емес ойық жара колиті, Крон ауруы) бар пациенттерге сақтықпен тағайындаған жөн, өйткені олар күшеюі мүмкін.

Жүрек-қантамырлық және цереброваскулярлық әсерлер

Анамнезінде гипертониясы және/немесе іркілген жеңілден орташаға дейінгі жүрек жеткіліксіздігі бар пациенттерге тиісті бақылау жүргізу және кеңес беру қажет, өйткені есеп беруге сай, ҚҚСП-пен емдеу сұйықтықтың іркілуін және ісінулерді туындатады.

Емнің бас кезінде және, әсіресе, Мелофлекс Ромфарм препаратымен емдеу кезінде қаупі бар пациенттерде артериялық қысымды клиникалық бақылау ұсынылады.

Клиникалық зерттеулерге және эпидемиологиялық деректерге сай, мелоксикамды қоса, кейбір ҚҚСП (әсіресе жоғары дозларда және ұзақ уақыт емдегенде) пайдалану артериялық тромбоздық асқынулар (мысалы, миокард инфарктісі және инсульт) қаупінің аздап ұлғаюын туындатуы мүмкін.

Мелофлекс Ромфарм үшін мұндай қауіпті жоққа шығару үшін қолда бар деректер жеткіліксіз.

Мелофлекс Ромфарм препараты бақыланбайтын артериялық гипертензиясы, іркілген жүрек жеткіліксіздігі, жүректің ишемиялық ауруы, шеткері артериялық ауруы және/немесе цереброваскулярлық ауруы бар пациенттерге мұқият баға берілгеннен кейін ғана қолданылуы тиіс. Осыған ұқсас баға беру жүрек-қантамыр ауруларының пайда болуының қауіпті факторлары (мысалы, артериялық гипертензия, гиперлипидемия, қант диабеті, шылым шегу) бар пациенттерде ұзақ емді бастағанға дейін жүргізілуі тиіс.

Тері реакциялары

Мелоксикамды пайдаланғанда өмір үшін қауіпті Стивенс-Джонсон синдромы және уытты эпидермальді некролиз сияқты тері реакциялары жөнінде мәлімделді. Пациенттерге тері реакцияларының белгілері мен симптомдары жөнінде және оның бар-жоқтығын мұқият бақылауы керектігі алдын ала ескертілуі тиіс. Стивенс-Джонсон синдромы мен уытты эпидермальді некролиздің пайда болуының өте үлкен қаупі емдеудің алғашқы аптасында байқалады.
Стивенс-Джонсон синдромы және уытты эпидермальді некролиз (мысалы, күлдіреуікпен немесе шырышты қабықтың зақымдануларымен жиі қатар жүретін тері бөртпесінің өршуі) пайда болған кезде Мелофлекс Ромфарм препаратымен емдеу тоқтатылуы тиіс. Стивенс-Джонсон синдромын және уытты эпидермальді некролизді бақылауда өте жақсы нәтижелер ерте диагностикада және кез келген күмәнді емді дереу тоқтатқанда алынады. Болжам жасау сапасы емдеуді ерте тоқтатуға байланысты.

Егер пациентте Мелофлекс Ромфарм препаратымен емдеу кезінде Стивенс-Джонсон синдромы немесе уытты эпидермальді некролиз дамыса, онда құрамында мелоксикам бар препарат пациентке бұдан былай тағайындалмауы тиіс.

Бауыр және бүйрек функцияларының параметрлері

Басқа да ҚҚСП жағдайындағы сияқты, трансаминазаның сарысулық мәндерінің, сарысулық билирубиннің немесе бауыр функциясының басқа да көрсеткіштерінің кездейсоқ жоғарылауы жөнінде, сондай-ақ сарысулық креатинин, мочевина мәндерінің және зертханалық талдаулардың басқа да өзгерулері жөнінде мәлімделді. Көптеген жағдайларда жоғарлаулар аздаған және өткінші болды. Егер осы ауытқулар елеулі немесе тұрақты болып табылса, Мелофлекс Ромфарм препаратын қолдану тоқтатылуы және баға берілуіне талдау жүргізілуі тиіс.

Бүйректің функциональді жеткіліксіздігі

ҚҚСП, бүйректік простагландиндердің қантамырларды кеңейтетін әсерін тежеу жолымен, шумақтың сүзілуді төмендету арқылы бүйрек функциясының декомпенсациясын туындатуы мүмкін. Бұл жағымсыз әсер енгізілетін дозаға байланысты. Емнің басында немесе дозаны арттырғаннан кейін келесі қауіп факторлары бар пациенттерде диурезге және бауыр функциясына мұқият мониторинг ұсынылады:

- егде жастағы адамдар

- сусыздану орын алған пациенттер

- АӨФ тежегіштері, ангиотензин II рецепторының блокаторлары, диуретиктер қолданылатын қатарлас ем қабылдап жүрген пациенттер

- гиповолемияға әкеп соғатын ауқымды операциялық араласымға ұшыраған пациенттер

- іркілген жүрек жеткіліксіздігі

- бүйрек жеткіліксіздігі
- нефроздық синдром
- жегі тәрізді нефрит

- бауырдың ауыр дисфункциясы (Чайлд-Пью жіктемесі бойынша сарысулық альбумин <25 г/л немесе ≥10).

Сирек жағдайларда ҚҚСП интерстициальді нефритті, гломерулонефритті, бүйректік медуллярлы некрозды немесе нефроздық синдромды туындатуы мүмкін.

Гемодиализде жүрген, бүйрек жеткіліксіздігінің терминальді сатысындағы пациенттер үшін Мелофлекс Ромфарм препаратының тәуліктік дозасы 7.5 мг-ден аспауы тиіс. Жеңіл немесе орташа бүйрек жеткіліксіздігі бар (креатинин клиренсі минутына 25 мл-ден көбірек) пациенттерде дозаны азайту қажет болмайды.

Натрий, калий және судың іркілуі

ҚҚСП натрийдің, калийдің, судың іркілуін туындатуы және диуретиктердің натрийурездік әсеріне кедергі жасауы мүмкін. Нәтижесінде осы әсерлерге ұшыраған пациенттерде жүрек функциясының жеткіліксіздігі немесе гипертензия күшеюі немесе өршуі мүмкін. Қауіп тобындағы пациенттер үшін клиникалық мониторинг ұсынылады.

Гиперкалиемия диабеттен немесе сарысулық калийді арттыруы мүмкін препараттарды қатар қолданудан туындауы мүмкін. Мұндай жағдайларда калий мәндеріне ұдайы мониторинг жүргізілуі тиіс.

Басқа да ескертулер және сақтық шаралары

Егде жастағы адамдар және әлсіз пациенттер жағымсыз әсерлерді көтеруі қиындау және мұқият бақылауды керек етеді. Басқа да ҚҚСП сияқты, Мелофлекс Ромфарм препараты егде жастағы пациенттерге сақтықпен қолданған жөн, өйткені олар бүйрек, бауыр немесе жүрек функциясының жеткіліксіздігіне көбірек ұшырайды. Егде жастағы пациенттерде ҚҚСП-ке жағымсыз реакциялардың, әсіресе асқазан-ішектік қан кетулердің және потенциалды өлімге әкелетін тесілулердің пайда болу жиілігі артады.

Мелофлекс Ромфарм, басқа да ҚҚСП сияқты, негізгі инфекциялық аурудың симптомдарын бүркемелеуі мүмкін.

Бұлшықет ішіне енгізілетін барлық ҚҚСП жағдайындағы сияқты, инъекция жасалған жерде абсцестер немесе некроз пайда болуы мүмкін.

Препараттың құрамында 1 ммольден азырақ натрий (23 мг) бар, 1.5 мл ампулада натрий іс жүзінде болмайды.

Үйлесімділігіне зерттеулер жоқ болған жағдайда, бұл дәрілік затты басқа препараттармен араластыруға болмайды.

Дәріханалар